ઈલેક્ટોરલ બોન્ડ કેસમાં સુપ્રીમ કોર્ટનો મોટો નિર્ણય : SBIએ આવતીકાલે સાંજ સુધીમાં વિગતો આપે

ઈલેક્ટોરલ બોન્ડ કેસમાં સુપ્રીમ કોર્ટે SBIની અરજી ફગાવી દીધી છે અને 12 માર્ચ સુધીમાં વિગતો આપવાનો આદેશ કર્યો છે. તેમજ ECને આ વિગતો 15 માર્ચ સુધીમાં જાહેર કરવા સૂચના આપવામાં આવી છે.કોર્ટે એસબીઆઈના સીએમડીને વિગતો જાહેર કરી એફિડેવિટ દાખલ કરવા કહ્યું છે. કોર્ટે SBI સામે કન્ટેમ્પ્ટ ઓફ કોર્ટની કાર્યવાહી શરૂ કરવાનો ઇનકાર કરતા ચેતવણી આપી હતી કે અમે SBIને નોટિસ આપી છે કે જો SBI આ આદેશમાં નિર્દિષ્ટ સમય મર્યાદામાં સુચનાઓનું પાલન નહીં કરે, તો પછી કોર્ટને તેની સામે કન્ટેમ્પ્ટ ઓફ કોર્ટની કાર્યવાહી કરવાની ફરજ પડશે.

ઈલેક્ટોરલ બોન્ડ કેસની સુનાવણી દરમિયાન સુપ્રીમ કોર્ટ અને SBIએ શું કહ્યું…

આજે સુનાવણી દરમિયાન સુપ્રીમ કોર્ટે SBI પર મોટી ટિપ્પણી કરી છે. CJIએ કહ્યું કે અમે તમને ડેટા મેચ કરવા માટે નથી કહ્યું, તમે ફક્ત આદેશનું પાલન કરો. જસ્ટિસ સંજીવ ખન્નાએ કહ્યું કે તમારે ફક્ત સીલબંધ કવરમાંથી ડેટા કાઢવાના છે અને મોકલવાના છે. CJI એ SBIને એ પણ પૂછ્યું કે તમે છેલ્લા 26 દિવસમાં શું કામ કર્યું ? તમારો કેટલો ડેટા મેચ થયો. મેચિંગ માટે સમય માંગવો યોગ્ય નથી. અમે તમને આમ કરવાની સૂચના આપી નથી. આખરે તમામ વિગતો મુંબઈની મુખ્ય શાખાને મોકલી દેવામાં આવી છે. તમે અરજીમાં કહ્યું છે કે આ માહિતી મેળવવી એ સમય માંગી લે તેવી પ્રક્રિયા છે.

પાંચ જજોની બંધારણીય બેંચ આ કેસની સુનાવણી કરી રહી છે

ભારતીય સ્ટેટ બેંક દ્વારા ઈલેક્ટોરલ બોન્ડ વિશે માહિતી આપવા માટે 30 જૂન સુધી લંબાવવાની માંગ કરતી અરજી પર સુપ્રીમ કોર્ટમાં સુનાવણી હાથ ધરવામાં આવી હતી. ADRની SBI સામે કન્ટેમ્પ્ટનો કેસ દાખલ કરવાની અરજી પર પણ સુનાવણી થઈ હતી. આ પાંચ જજોમાં CJI D.Y.ચંદ્રચુડ, જસ્ટિસ સંજીવ ખન્ના, જસ્ટિસ બી.આર. ગવઈ, જસ્ટિસ જે.બી. પારડીવાલા અને જસ્ટિસ મનોજ મિશ્રાની બંધારણીય બેંચમાં સુનાવણી થઈ હતી.

અમને વધુ સમયની જરૂર છે: SBI

આજે યોજાયેલી સુનાવણી દરમિયાન હરીશ સાલ્વેએ SBI વતી દલીલ કરી હતી કે અમને વધુ સમયની જરૂર છે. સાલ્વેએ કહ્યું કે સુપ્રીમ કોર્ટના નિર્ણય મુજબ, SBIએ એપ્રિલ 2019 થી અત્યાર સુધીની વિગતો ચૂંટણી પંચને આપવી પડશે. અમારી એકમાત્ર સમસ્યા એ છે કે અમે સમગ્ર પ્રક્રિયાને ઉલટાવવાનો પ્રયાસ કરી રહ્યા છીએ. અમારી SoPએ સુનિશ્ચિત કર્યું કે અમારી કોર બેંકિંગ સિસ્ટમ અને બોન્ડ નંબરમાં ખરીદનારનું કોઈ નામ નથી. અમને કહેવામાં આવ્યું હતું કે ખરીદનારનું નામ ગુપ્ત રાખવામાં આવે. અમે માહિતી એકત્રિત કરવાનો પ્રયાસ કરી રહ્યા છીએ. CJIએ કહ્યું કે તમે કહો છો કે દાન આપનારની વિગતો ચોક્કસ શાખામાં સીલબંધ પરબિડીયામાં રાખવામાં આવી હતી. તમામ સીલબંધ એન્વલપ્સ મુંબઈની મુખ્ય શાખામાં જમા કરવામાં આવ્યા હતા. બીજી તરફ, રાજકીય પક્ષો 29 અધિકૃત બેંકોમાંથી પૈસા ઉપાડી શકે છે. SBIના વકીલ હરીશ સાલ્વેએ દલીલ કરી હતી કે ઈલેક્ટોરલ બોન્ડની ખરીદીની તારીખ અને ખરીદનારનું નામ એકસાથે ઉપલબ્ધ નથી, તેમને કોડેડ કરવામાં આવ્યા છેઅને તેને ડીકોડ કરવામાં સમય લાગશે.

26 દિવસમાં તમે શું પગલાં લીધાં: SC

CJI એ કહ્યું કે તમારા FAQ પણ સૂચવે છે કે દરેક ખરીદી માટે તમારી પાસે અલગ KYC હોવું જોઈએ તેથી જ્યારે પણ ખરીદી કરવામાં આવે ત્યારે KYC ફરજિયાત છે. આના પર સાલ્વેએ કહ્યું કે અમારી પાસે વિગતો છે, હું એમ નથી કહેતો કે અમારી પાસે નથી. SBIએ કહ્યું કે અમારી પાસે તમામ માહિતી છે, કોણે બોન્ડની ખરીદી કરી છે, તે કઈ રાજકીય પક્ષમાં ગયા છે. CJIએ કહ્યું કે અમારો ચુકાદો 15 ફેબ્રુઆરીએ હતો, આજે 11 માર્ચ છે. છેલ્લા 26 દિવસમાં તમે કયા પગલાં લીધાં છે? તે અંગે કોઇ ઉલ્લેખ કરવામાં આવ્યો નથી. તમારે જાહેર કરવું જોઈતું હતું કે કામ થઈ ગયું છે અને અમારે વધારે સમયની જરૂર છે. અમે સ્ટેટ બેંક ઓફ ઈન્ડિયા પાસેથી થોડી સ્પષ્ટતાની અપેક્ષા રાખીએ છીએ.એસબીઆઈએ કહ્યું કે બોન્ડ કોણે ખરીદ્યા તે કહેવું સરળ છે, પરંતુ બોન્ડ નંબરની સાથે નામ જણાવવામાં સમય લાગશે.

જસ્ટિસ ખન્નાએ કહ્યું કે અમે માની રહ્યા છીએ કે તમને ખરીદદારો અને રાજકીય પક્ષોના નામ આપવામાં કોઈ મુશ્કેલી નથી. એકમાત્ર મુશ્કેલી મેચિંગમાં છે. 26 દિવસમાં શું થયું? કંઈક તો થયું જ હશે. એવું કહેવામાં આવ્યું હતું કે બોન્ડમાં કેટલાક નંબરો હોય છે. તેના પર સાલ્વેએ કહ્યું હતું કે તે નંબરને ગુપ્ત રાખવામાં આવે છે, તે દાખલ કર્યા પછી દરેક ટ્રાન્ઝેક્શનને ટ્રેસ કરવું પડશે. CJIએ કહ્યું કે વચગાળાના આદેશના પાલનમાં ECIએ વિગતો આપી છે. રજિસ્ટ્રીએ તેને સુરક્ષિત કસ્ટડીમાં રાખ્યો છે. અમે તેમને હવે તેને ખોલવાની સૂચના આપીશું.અમે ECI પાસે જે કંઈ છે તે જણાવવા અને SBIને તમારી પાસે જે કંઈ છે તે જણાવવા માટે કહીશું. તમારે કોર્ટના આદેશ મુજબ કામ કરવું પડશે. તમારે ECI સાથે માહિતી શેર કરવાની રહેશે કારણ કે આ બહુ ગંભીર બાબત છે.

SBIએ ત્રણ અઠવાડિયાનો સમય માંગ્યો હતો

એસબીઆઈએ આજે ​​યોજાયેલી સુનાવણીમાં કહ્યું કે તે સુપ્રીમ કોર્ટ પાસેથી સ્પષ્ટતા ઈચ્છે છે. સુપ્રિમ કોર્ટ વિગતો તપાસી રહી છે. SBIએ કહ્યું કે અમે બોન્ડ નંબર, નામ અને બોન્ડની રકમ વિશે આગામી બે-ત્રણ અઠવાડિયામાં માહિતી આપી શકીએ છીએ. સાલ્વેએ કહ્યું કે જો B અને C મેચ ન થાય તો અમે 3 અઠવાડિયાની અંદર માહિતી આપી શકીએ છીએ.

અમારે તપાસ કરવાની જરૂર છે કે SBI દ્વારા કરવામાં આવેલી માંગ વાજબી છે કે કેમ: SC

સુપ્રીમ કોર્ટે કહ્યું કે SCમાં, SBIએ સમયમર્યાદા સમાપ્ત થવાના 2 દિવસ પહેલા આ કોર્ટમાં અરજી દાખલ કરીને 30 જૂન સુધી લંબાવવાની માંગ કરી હતી. SBI માટે સમય વધારવાની માગણી કરવી યોગ્ય છે કે કેમ તેનું વિશ્લેષણ કરવું જોઈએ. SBI એ આધાર પર સમય વધારવાની માંગ કરે છે કે “ચૂંટણીના બોન્ડને ડીકોડ કરવાની અને દાતાઓને મળતા દાનની પ્રક્રિયા” એક જટિલ અને સમય માંગી લેતી પ્રક્રિયા છે. સુપ્રીમ કોર્ટે કહ્યું કે અમારે તપાસ કરવાની જરૂર છે કે શું SBI દ્વારા કરવામાં આવેલી માંગ વ્યાજબી છે? જેમાં કહેવામાં આવ્યું છે કે જ્યાં સુધી બોન્ડના વેચાણ અને તેને વટાવવાનો સંબંધ છે તે માહિતી ડિજિટલ ફોર્મેટમાં ઉપલબ્ધ નથી. આ સિવાય કોઈ કેન્દ્રીય ડેટાબેઝ નથી. દાતાની વિગતો, પ્રાપ્તકર્તાની વિગતો બે અલગ-અલગ સિલોમાં ઉપલબ્ધ છે. સુપ્રીમ કોર્ટે કહ્યું કે 12 એપ્રિલ 2019 થી 15 ફેબ્રુઆરી 2024 સુધી 22217 બોન્ડ ખરીદવામાં આવ્યા હતા. SBIની દલીલનો ભાવાર્થ એ છે કે કયા રાજકીય પક્ષમાં કોણે યોગદાન આપ્યું છે તે શોધવા માટે માહિતી મેળવવી એ સમય માંગી લે તેવી પ્રક્રિયા છે, કારણ કે માહિતી બે અલગ-અલગ ફાઇલોમાં રાખવામાં આવે છે.

Leave a Comment

Your email address will not be published. Required fields are marked *

Scroll to Top